अन् दीपिकाच्या मदतीला धावला रणवीर

नुकतेच इटलीतील लेक कोमो येथे रणवीर सिंह आणि दीपिका पादुकोण यांनी लग्नगाठ बांधली. यानंतर बंगळूरुमध्ये बुधवारी लग्नाचे रिसेप्शन पार पडले. दोघांच्या कुटुंबातील नातेवाईक यावेळी सहभागी झाले होते. सोशल मीडियावर या दांपत्याचा लूक व्हायरल होत आहे. पण या लूकपेक्षाही जास्त एक व्हिडिओ सध्या सोशल मीडियावर चांगलाच व्हायरल होताना दिसत आहे.
दीपिका रिसेप्शनमध्ये गोल्डन कलरची साडी आणि ग्रीन कलरच्या ज्वेलरीमध्ये दिसली. दीपिकाने रिसेप्शच्या ठिकाणी रणवीरच्या हातात हात घालून प्रवेश केला. फोटोसाठी पोज देत असताना दीपिकाच्या साडीचा पदर उलटा झाला. रणवीरने यावेळी क्षणाचाही विलंब न करता तातडीने तिच्या साडीचा पदर नीट केला. सध्या या दोघांचा हा व्हिडिओ चांगलाच व्हायरल होताना दिसत आहे.
दीपवीरने बंगळूरुपाठोपाठ आता मुंबईतही रिसेप्शनचे आयोजन केले आहे. 28 नोव्हेंबर आणि 1 डिसेंबरला मुंबईतील ग्रँण्ड हयात येथे हे रिसेप्शन पार पडणार आहे. 28 नोव्हेंबरला रणवीरच्या घरच्यांसाठी, तर 1 डिसेंबरला बॉलिवूड कलाकारांसाठी रिसेप्शन ठेवण्यात आलं आहे.